Europako itsasoetan, tenperaturen gorakada geroz eta kezkagarriagoa da. Hala zer dion asteazken honetan, agorrilaren 19an, atera den World Weather Attribution kolektiboaren ikerketak. Mediterraneoan baldin badira gorakada inportanteenak, itsaso guzietan tenperatura kezkagarriak neurtuak izan dira. Ikerketaren arabera, Bizkaiko golkoan beroketa klimatikoarengatik uraren tenperatura 1.6 graduz igan da uda huntan.

Hemengo arrantzaleek ondorioak ikusten dituzte: atun gorria geroz eta gutiago ikusten da ur hotzagoak xekatzen baititu. Béatrice Elissalde arrantzaleak gure mikroan esplikatu du atun gorria hemengo udako "arrain enblematikoa" zela baina azken urteetan gutiago agertzen zela. Arrain gehienek odol hotza baldin badute, atun gorriak aldiz beroa du. Barne tenperaturaren orekatzeko, jaten du anitz. Ondorioz, uraren berotzearekin geroz eta gehiago jaten du. Egokitzeko, ur hotzagoengana doa iparralderuntz, Bretainiara edota Mantxako kanalera.

Ekosistema guzia da aldatzen uraren berotzearekin. Béatrice Elissaldek oroitarazten du duela hogei urte arribatu zela lehen aldikotz baleztarraina, arrain tropikal bat. Gaur egun, gure kostaldean denetan atzematen da. Gauza bera da Coryphaena hippurus edo Mahi mahi arrainarendako. Ekosistema aldatzen ari dela beraz bai, baina fite. Béatrice Elissaldek argi du horren parean arrantzaleek ere segitu beharko dutela: "nola orekatuko den hori guzia ez dakigu, baina badakigu adaptatu behar girela sekulako aldaketak baitira itsasoan".