Landako guneak eta bere 285 erakusmahaiak ti-ta batean bete dira jendez. Gaztez, hobeki erranik; ikasleen eguna da gaur Durangoko Azokan. Landako gunea ez ezik, haatik, bertze hainbat gunek ere egin dute irekiera: Ahotsenea zuzeneko musikaren guneak Plateruenan eta literaturaren guneak musika eskolan, Irudienea ikus-entzunezkoen plazak zineman edo Saguganbara haurren plazak Saguganbaran.

Aurten, urteurren borobilarekin, bi apustu berri egin ditu Gerediaga elkarte antolatzaileak. Liburu eta diskoetatik harago joateko engaiamendua du azokak aspaldian, eta aurten arte ederren eta podcasten mundura egin dute jauzi, Atartea eta Berbagailua guneekin, hurrenez hurren.

Ipar Euskal Herritik, sareturik eta saretzera

Ipar Euskal Herritik, 55 nobedade ekarri dituzte sortzaileek Azokara: 41 liburu, 13 disko eta bideo-joko bat. Zuzenean ariko dira Ahotsenean Ekiza, Odei, Karma eta Ixabe, eta Ibawa dantza garaikide kolektiboak Gauaikusgarria emanen du larunbatean Szenatokia plazan.

Karma taldeko kideek zein Maita Kultura elkarteko buruek Durangon sortzen diren saretzeak azpimarratu dituzte Euskal Irratietan, artisten artean batetik, antolatzaileekin bertzetik, baita publikoarekin ere.