Iragan asteazkenean izan zen Paueko Auzitegi Administratiboan prefeturak emandako helegitea aztertzeko berehalako auzia, eta aste bukaerarako iritsi zen emaitza: behin-behinean, bertan behera utzi ditu epaitegiak Saran eta Baionan herriko etxeek euskarari egindako aitortzak. Auzi azkarra izanik, forma aztertu zuten eta auziaren funtsa oraindik ere ebaztekoa da. Hala ere, erabaki honi errekurtsoa jarriko diotela adierazi du Baionako herriko etxeak, eta Sarako kontseiluak ez du oraindik haren azken deliberoa hartu baina helegitea jartzeko xantzak badira. Epaiketa egunean, Jean-René Etxegarai Baionako auzapezak adierazi zuen Kasazio Auzitegiraino iristeko prest direla.

Errepublikako Konstituzioaren bigarren artikulua bortxatzen dutelakoan utzi dituzte bertan behera aitortzak, frantsesa Frantziako hizkuntza bakarra dela dioen artikulua hain zuzen ere. Alta, joan den astean Euskal Irratietan mintzatu zen Antton Kurutxarri Baigorriko auzapez eta Euskal Hirigune Elkargoko hizkuntza politikarako lehendakariordea, eta hark azaldu zuen zein oinarritan egiten diren aitortza hauek: "Bada 45 urte abantzu Konstituzioan idatzia dela udalerriek badutela haien administrazioaren eramateko libertate osoa", eta gehitu "Elkargoaren deliberoak, Sarako deliberoak, Baionako deliberoak ez dute ofizializatzen euskara, egiten dute akta ofizial bat, non ematen dioten euskarari inportantzia".

Esteban Barneix Sarako auzapezak Sarako hautetsien lanaren errespetatzea galdegin du gure mikroan. Haren erranetan, kontseiluko 23 hautetsiek aitortzaren alde bozkatu zuten, eta auzitegiaren erabakiak hautetsi horien boza eta lana ez dituela errespetatzen iduri zaio Barneixi. Horrez gain, argi du Herriko Etxeak ezin duela erabaki zein hizkuntza ofiziala izan behar den herrian, baina entretenitzen duten mugaz gaindiko harreman azkarra errexteko asmotan ibiltzen ziren erabaki sinboliko horren bidez; baita erakusteko ere Saran dena euskaraz egiten ahal dela.

Euskal Konfederazioak, hauteskunde kanpainan herriko etxeak euskararen aldeko erabakiak hartzera sustatu zituenak, auzitegiaren erabakia gaitzetsi du ohar bidez. Anartean, erakunde gehiagotan ikusi nahi lukete Saran eta Baionan hartutako erabakia: "Euskal Konfederazioak ipar Euskal Herriko herriko kontseiluko guziak intimidazioen aitzinean buru egitera deitzen ditu, Sarako, Baionako eta Itsasuko herriko kontseiluek hartu bezalako deliberoak bozkatuz. Elkartea prest da hautetsiekin biltzeko, herriz herri, ekimen horren nondik norakoak berriz azaltzeko". Azaroaren 21ean Baionan antolatuko duten manifestaldira batzeko deia errepikatu du Konfederazioak, "Euskararen garaia da" lelopean.