Asteazken arratsalde honetan, Aldako kideak Baionako apartamendu bateko gela ezberdinetan elkartu dira maskak bisaiaren aitzinean salatzeko hezetasun arazoak etxebizitza sozialetan. Eraman dituzten afixetan irakurtzen ahal da: "Hezetasuna: Alokatzaileek hats berria behar". Aldak ehun bat galde ukan ditu arazo honi buruz.

Hezetasunak sorturiko mutxidurak bertan bizi diren familiako kideei eritasunak sortu dizkie, batez ere arnas egiteko zailtasunak. 2020an, apartamenduan sartu zirenean, zuzenki ohartu ziren hezetasun arazoez eta etxebizitza aldaketa galdeginik ere, ez zaie apartamendu egokirik proposatu. Familiako aitak bere lana galdu du osasun arazoengatik. Ber eraikinean, beste familia batek ber osasun arazoak ditu. Aldako kideek galdegin dute bertan bizi den familiari beste etxebizitza sano baten atzematea eta eraikinaren berritzea eskatzen dute aireztatzeko sistema bat emanez.

Ikusiz eskuratzen dituzten kasuen kopuru handia, Aldak diagnostiko handi bat hasiko du heldu den urtarriletik goiti Ipar Euskal Herriko etxebizitza sozialetan ikusteko zein heinetara heltzen den hezetasun arazoa eta nolako eragina duen alokatzaileen osasunarengan.